ما ياسعه عقلك ، ولا تّفهمينه
وصعبٍ على حله بنات الشياطين
حمله ثقيل وصعب مثلك يعينه
يشيل ماشاله ظهور البعارين
يعطي وينسى ما تمده يمينه
ولا أترجى غير دعوة مصلين
إذا كتب جفت بحوره بعينه
ولامن قريتي ماعرفتي قصد مين
الناس تمشي في عيونه وبينه
يبحث مع الماضي يدور له سنين
لامر يومه قال : باكر يـ زينه
ولا شاف باكر قال أمسه هو الزين
لا ضاق في عينه تضيق المدينة
يبي يمد الشوف مايحجبه شين
يسأل عن الحاجه وهي في يمينه
ولا شافها يشعر بحال المجانين
فجره بعيد ارجوك لا تسهرّينه
ولا تسهرين ارجوك والله تضيعين
حاله قصيدة .. والمعاني دفينة
تبطين فهمه حيل يا بنت تبطين
