مقامات

خذ خفوقي وما به جمرته وحْطبه
كل ما احتجت تشعل في خفوقك سعير
وكل ما طاب بك جرح اغتراب اعطبه
خل ما يألمك «لك» فـ المنافي سفير
وكل ما يعجبك من حزني استقطبه
كود تلقاه في وحدتْك جمعٍ غفير
 عجّل بْـ يوم موت الحلم أو ابطْ به
والله انه على دربك يحّث المسير
 وكان لك (متن) ما يعرف وش الطبطبة
فـ اْعرف انك شبيهي تايه بْلا مصير
 ليت بعض الشعر له (ودّ) لاْجل (اخطبه)
ليت كل الشعر جار الحشا واستجير
 ما كتبت القصيد الاّ عشان اشطبه
كان ما فاح لـ وْرود المشاعر عبير
جذع صوتي تساقط بالكلام رْطبه
ما بقى بي كثر مابي للاسرار بير !