يذوب الحكي بلسانك ويسقي بالشهد انسان
عطش عاش العمر وانتي مزون الديم هتانه
مدامك داخله توت المشاعر .. والغلا نشوان
رقص كل الشعر فرحه على طاروق وجدانه
أحبك ! كيف ما احبك وحبك يالغلا شريان
يضخ الدم بعروقي ويروي روح ولهانه
وش اكثر من كذا نعمه وش اكمل من كذا رضوان
اخذت من الغلا عرشه وفزت بروح انسانه
خفيفة روح تتهادى نسايم تضفي التحنان
على صدر الحزين اللي غرق في صفحة اشجانه
جميله في دلعها ينتثر عطر الحكي بستان
تهادى الحرف في سحر الكلام وفاح ريحانه
وفيه حيل ما تنسى غلاي وكلها وجدان
تبلل بالمطر غيمي وهي بالحيل ضميانه
تجيني نور في جنح الظلام وخلوة الاشجان
تصحي به فرح ميت ذبل وصفرت الوانه
تبعثرني مشاعرها اغني وانسكب الحان
تسلطن بي بلابلها وروح القلب هيمانه
مليت النبض من كاسك الين اعشوشب الديوان
قصايد بوح تسكن به مدن بالحب رويانه
مدام الحكي بلسانك يحرض ريشة الفنان
رسم باحساسه بحور القصايد وانتي الدانه
عرفتي كيف يانبضي وصدقي يا اقرب الخلان
احاسيسك مطر عمري فديت الحس واوطانه !
