مقامات

تحبيني؟
إذا فعلاً تحبيني
اتركي جرحي ينام اشوي
اتركي لي شي
من حزني يدفيني
 

عوفيني
بليا أسئله وتخمين
أنا لـ الحين
صدقيني
عجزت اعرف شنو فيني
عجزت اعرف ألاقيني
أنا ويني؟
 

ضويت اشموعهم عيني
رسمت احروفهم شامه
على قلبي .. على ايديني
وخلوني
أنا مدري
ليه راحوا وخلوني!

 
واستغرب
من الدهشه
تحجر دمعي بـ اجفوني
سكبته في شراييني
معَ دمي
وبدا همي
على وجهي
ينكس هامة اسنيني


وعافوني
لقيت الدرب بلياهم
طفل غافي
على نبضي
بعز النوم من يبرد
أحس ابكاه بـ اشفافي
عطش يصحا ويصحيني


واسهرني
على ذكراهم الـ مرت على بالي
وانا الـ حالي
أذوبني افـ سوالفهم
أدورني .. ألاقيني
عسل مُره يغلي في شراييني


تريديني بعد أحكي؟
من اعيوني
أنا خوفي يجي بكره
وانا بعدي
محبوسه افـ عذاب الأمس
وتبقى واقفه اسنيني
على ذكرى ملامحهم
وماضيهم
ويش اترجى بعد فيهم
وحق اللي
زرعهم ضي في اعيوني وطفوني
عوفيني
اتركي همي يواسيني

 
سألتيني .. أنا اشفيني؟
تعرفيني
تمادى جرحي واتفنن بـ تعذيبي
على الـ راحوا
وكانوا أطهر اذنوبي
وبعدني ارتكب ذكرى خطاياهم
من النسيان أصحيني
إذا مروا على بالي
أضيع افـ زحمتي فيني
واحن الهم .. أعاتبهم
لا والله
أعاتبني أنا الـ وحدي واحاتيني
أبعثرني وأجمعني
الملمني من الماضي
واسألني .. أنا ويني؟