ويسألني توترها .. يعكرب شفتين بـ : آه
واقول الصمت أعظم صوت لو انك .. سمعتيني
يابنت من الظمى جيتي وجيتك ما اخبر : شفاه
منين ارتاح ؟! و بآخر طريقي موت ناصيني
دخيلك اختفي من قبل يقبل عمري من اقصاه
وانا بفم الليـالي لجل أنـزع خبـز : أخييني
أخاف احضنك واتلاشى : ( يتاما ) والدروب افواه!
وأتشرد على شباك عمرك لاسألوا : ويني؟!
دخيلك اختفي مثلي مثل بيرٍ غدر به مـاه
تساوى وإندفن من عقب ما هالكل راويني
يديني : تخبز لجوعي وياخذ خبزي من يبغاه
و اقول الحمد للي مـا تركني أخبز : يديني
أمد من المنافي درب أقول ان الوطن شرواه
ويصرخ بي وطن .. يا بوك لا تشمت شياطيني
وأستغفر ، أخاف اني جرحته والسبب : أهواه
و أقبّل في ترابه لين أراضيه و يراضيني
واجر ظلالي اللي ما قدرت ارفعه خوف اطـاه
وأنفث في ظلامه كل خفاشٍ يجي ديـني
يابنت اسري ترى ليلك طمع بالذيب قبل الشاه
و انا بدفن خطاوي جيتك واطفي نظر عيني
يابنت وأبعدت ، ثم ابعدت ، ثم اختفت ثم : يااااه
كبرت بلحظتين تقول : مايمدي و يمدينـي
وباكر لا لمحني طفل : عودٍ يبتلش بحـذاه
بقول اني كبرت وما خبرت اللي بلش فيني
كبر سرك معي : شيبٍ ، يوقرني وأنا أقـراه
على رعشة كفوفٍ لا سألوني قلت "من حيني!"
على سجة خيالٍ لا حضربك مد لي يـمـناه
يوصلني لبيــت ٍ طــاح من كبـــره : يربيني
أمره وأسمع ابوابه تسبح ما عرف من جاه
وأتنحنح ، أخاف أقاطعه ويـفـز : يبكيني
والا من زفـَّت الذكرى خيالك عند باب بكاه
حضنتك لين تنساني عصاتي وترجع سنيني
وأبعد ثم أبعد واختفي غايب رموا : أشياه
ويبقى الصمت اعظم صوت لو ماحدٍ بيوحيني
وابذكر بعد اذن الله ,, وأقول الله يا الله !
نسيتينـي ، نسيتينـي ، نسيتيني ، نسيتيني !