على طاري غلاك وذكريات اهل الغلا والذوق
وريحة عشقك اللي خالطت روحي ووجداني
توقفت انتظرك وحولي اصفوف الوله والشوق
وونات الخفوق اللي تدندن لحن احزاني
وفي كل اتجاهات الامل ضاعت سنين العوق
تدور في متاهت الاماني حلمك الفاني
وانا واللهفه اللي داخلي واحساسي المحروق
تهاوينا على درب الغرام وطيفك الجاني
ورغم اللي حصل تبقى بعين اللي يحبك فوق
وتبقى داخل أركان الخفوق تعيش وحداني
تشاركني حياتي وان حكيت يخصك المنطوق
احس ان الحروف مسيره يمك وتعصاني
واذا فكرت اداري حبك المتعالي المرموق
لقيته يترسم حمره على اطراف اوجاني
فضحني حبك وغير حياتي وستلذ الموق
دموع نازفه تسري مثل همال وداني
تسابقها الغيوم ويعقب اقبال الغيوم ابروق
تنير الظلمه اللي داخلي وتزلزل اركاني
حبيبي لا تعاتبني وعامل خافقي برفوق
انا والله ما حبيت غيرك واحدن ثاني
عطيتك قلبي الوافي ورحت بجرحك المفتوق
بعد ما سجلت فوق الضلوع نقوش ما كاني
تصدق ما عشقت من البشر قبلك ابد مخلوق
وتصدق ما بكيت من الوله قاصي ولا داني
وتصدق ما ندمت الا على طيف يجي بشفوق
يحاول يرسم البسمه على شفة حلم عاني
فقدته بعد ما قفت ليلي حبك المسروق
من اوقات الجمال اللي تعطر حضنك الحاني
عسى الله يحفظك كلك ويحفظ طيفك الموثوق
بداخل ذكراياتي يا اول احباب وخلاني
وهذا اخر كلامي لك كتبته بعذب الطاروق
عساها توصلك ونات روحي عبر قيفاني