مقامات

(1)
ليش راح ؟!
ليش فجأة ..
غاب عن عينك .. و راح ؟!
ما ترك  لك ..
حتى عنوان ف رساله
لا ..ولا  تذكار
من  طيفه  ..وخياله
و إلا.. نظرة
توعد بعذر  وسماح
ليش  راح ؟!
ليش خلاّك  ف غيابه
تلعق  ايدين الجراح  ؟!
(2)
ليش راح؟!
ليش فجأة ..
غاب عن عينك وراح ؟!
ما ترك لك ..
حتى لو نبرة ف عتابه
لا ولا قدّر وقوفك ..أو حروفك
يوم خانته الكتابة
ما ترك لك ..من ثيابه
غير حزنٍ ..ياكل ف بعضك وكلّك
ما ترك لك ..
إلا ظلك ..إلا غلّك في عذابه وارتيابه
إلا غيم من يبّلك
طار  ..مثل الريش تذروه الرياح
ليش راح ؟!
ليش خلاّك ف غيابه
تلعق ايدين الجراح ؟!
(3)
ليش راح ؟!
يلّي رتبت المسا..حضن ومسافة
يلّي خلّيت البنفسج
يعلن الشوق ..  لضفافه
لجل يشوف الضيق
ف  الدنيا ..براح
ليش راح ؟!
ليش لما ..صفصف الريش ف جناحه
ما ترك  لك ..
حتى ريشة  
والا  كسرة  من  جناح
ما ترك لك ..
حتى لو نيمة جريحة
والا ريحة
من سوالف هالليالي
والا من ذاك الصباح  
ما ترك  لك ..حتى كلمة
ما ترك  لك ..
غير  جرح ٍ  من تشمّه
انفتح حزنك
على السكة ..وصاح
ليش راح ؟!
ليش خلاّك  ف غيابه
تلعق ايدين الجراح ؟!
(4)
ليش  راح ؟!
ليش فجأة ..
غاب عن عينك و راح ؟!
ما ترك  لك ..
حتى لو  ريحة سلام
او حمام .. يرفرف بهمسة  وليف  
أو خريف  تسولف  ايامه
على نفس الرصيف
يلّي صرت الدرب
لخطاه ..وكلامه
يلّي سيّلت الأغاني .. لهمسته
غيم .. وحمامة      
يلّي صرت  لدمعته
أحلى ابتسامه
ما ترك لك ..
في زوايا عتمتك ..نيمة بعيدة
ما تذّكر ..يوم صوتك
كان عيده
وما  تذّكر منهو شاله ..يوم  طاح ؟!
ما تذّكر ..
منهو  سوّى  الدمعة شمعة
ما تذّكر
هالحزن ويا الفرح ..
شلّي يجمّعه ؟!
وما تذّكر
من تعب لجله  ..
ولا يوم ..استراح
ليش راح ؟!
ليش خلاّك ف غيابه
تلعق ايدين الجراح ؟!  
(5)
هذا صوته ف الأماكن ..
وهاذي آثار الكحل
وهاذي نوته ..
ترتجي عوده  ..ولكن
ما بقى ف الروح  ..كثر اللي رحل
ما بقى ف البوح  ..كثر اللي ذرفته
والا في لحظة  ..تكّسر وارتحل
ما بقى ف الليل ..
لعيوني وسادة ..
والا شمعٍ .. يحتفل
ما بقى ف الغيم عادة   
وما بقى ف الغيم
أحلام ..لطفل

 بدر الدوسري
badermkd@batelco.com.bh